प्राकृतिक ओठ

काळे ओठ प्राकृतिक गुलाबी, मुलायम आणि आकर्षक करण्याचा आयुर्वेदातील सर्वोत्तम उपाय :

हा एक ठेवणीतला उपाय आहे, जो आज मी आपणापुढे प्रस्तुत करत आहे.

अनेक महिला व पुरुष नाकी डोळे खूप छान असतात, चेहराही उजळ असतो परंतु ओठ काळे असतात अथवा ओठांवर काळे / सफेद दाग, धब्बे असतात त्यामुळे त्यांना त्यांच्या सौन्दर्यात हा एक दाग असल्यासारखा वाटतो. किंबहुना त्यांनाही ही गोष्ट आवडत नाही. 

महिलांना तर ही गोष्ट खूपच प्रकर्षाने जाणवते. असे काळे ओठ झाकण्यासाठी महिला ओठांवर लिपस्टिक चा वापर अधिक करतात. असे केमिकल युक्त पदार्थ ओठांचे मूळ सौन्दर्य अजून खराब करते. मी मागेही सांगितले, कोणत्याही सौन्दर्य प्रसाधन साहित्यात अनेक रासायनिक पदार्थ मिसळलेले असतात जे ओठांच्या नाजूक त्वचेसाठी अत्यंत हानिकारक असतात. तात्पुरते सौन्दर्य खुलवण्यासाठी या रासायनिक भेसळ साहित्यापासून दूर राहून आपल्या प्राचीन आयुर्वेदात सांगितलेल्या उपायांचा वापर नेहमी करावा. याने कोणत्याही प्रकारची हानी होत नाही शिवाय ओठ अतिशय सुंदर आणि आकर्षक होतात.

फक्त थोडीशी मेहनत आवश्यक असते.

काही व्यक्तींना जन्मजात असे काळे ओठ प्राप्त होतात तर काहींना गंभीर आजारातून बाहेर पडल्यावर औषधांच्या ऍलर्जीच्या माध्यमातून अशा समस्येला सामोरे जावे लागते.

कारण कोणतेही असो....

हा आयुर्वेदातील सर्वोत्तम उपाय करून पहा.

यासाठी तुम्हाला पुढील साहित्य हवे जे अतिशय किरकोळ आणि सहज उपलब्ध होणारे आहे.

०१) ग्लिसरीन ( मेडिकल मध्ये सहज उपलब्ध होते )

०२) लिंबाचा रस.

०३) पाच वर्षाच्या आतील बालकांसाठी वापरण्यात येणारा टूथ ब्रश.

एका स्वच्छ काचेच्या बाटलीत ग्लिसरीन 5ml व लिंबाचा रस 5ml एकत्र मिसळावा. हे मिश्रण तुम्ही सात दिवस वापरू शकता. हे मिश्रण संपले की पुन्हा याच प्रमाणे नवीन तयार करून पुढील सात दिवस वापरा.

सकाळी उठल्यावर दात घासून झाले की लहान मुलांच्या टूथब्रश वर हे लिंबू मिश्रित ग्लिसरीन घेऊन ओठांना सावकाश घासणे. यामुळे ओठांवरची पहिली लेअर साफ होते व ओठांची त्वचा कोमल, मुलायम होते.

तोंड बंद करून हे ग्लिसरीन थोड्या वेळ ओठांवर हलक्या हाताने घासावे. तोंडात जरी हे द्रावण गेले तरी अडचण नाही कारण ग्लिसरीन हानिकारक नसते. 

त्यानंतर चेहरा स्वच्छ धुवावा. दुधाच्या साय मध्ये अगदी किंचित हळद पावडर टाकावी व हे मिश्रण एकजीव करावे. ही हळद मिश्रित साय देखील तुम्ही पुढील सात दिवस वापरू शकता. फक्त एक काळजी घ्या ही साय अगदीच हलकी पिवळी दिसेल एवढीच हळद त्यात मिसळा. ही साय ओठांवर एक लोशन म्हणून लावावी व किमान दोन तास तरी ठेवावी. त्यानंतर तुम्ही स्वच्छ पाण्याने ओठ साफ करू शकता.

भाजी मंडई मध्ये बिट हे बाराही महिने मिळते. बिटाचा एक छोटा तुकडा कापून तो ओठांवर किमान पाच ते दहा मिनिटे घासावा. बिट मध्ये जो लाल रंगाचा रस असतो तो ओठांच्या कोमल त्वचेसाठी खूपच उपयुक्त असतो.

बिटाचा तुकडा तुम्ही दिवसभरातुन कधीही ओठांवर घासू शकता. एखादेवेळी बिट उपलब्ध नसेल तरी हरकत नाही मात्र वरील दोन उपाय नियमितपणे करायचे आहे.

तसेच सकाळी एकदा व रात्री झोपण्यापूर्वी एकदा वरील दोन्ही प्रयोग सलग काही दिवस न कंटाळता नियमपूर्वक करायचे आहेत.

आपणास या उपायाचा काय फरक जाणवला मला अवश्य कळवा.

धन्यवाद,